ਮਾਊਂਟ ਐਵਰੈਸਟ ਫਤਹਿ ਕਰਨ ਵਾਲੇ NCC ਕੈਡਿਟਾਂ ਲਈ ਚੰਡੀਗੜ੍ਹ ਹੈੱਡਕੁਆਰਟਰ ਵੱਲੋਂ ਸ਼ਾਨਦਾਰ ਸਨਮਾਨ ਸਮਾਰੋਹ ਆਯੋਜਿਤ

ਚੰਡੀਗੜ੍ਹ: ਐਨਸੀਸੀ ਗਰੁੱਪ ਹੈੱਡਕੁਆਰਟਰ, ਚੰਡੀਗੜ੍ਹ ਵੱਲੋਂ ਇੱਕ ਸ਼ਾਨਦਾਰ ਸਨਮਾਨ ਸਮਾਰੋਹ ਦਾ ਆਯੋਜਨ ਕੀਤਾ,  ਜਿਸ ਵਿੱਚ ਮਾਊਂਟ ਐਵਰੈਸਟ ਵਰਗੀ ਦੁਨੀਆ ਦੀ ਸਭ ਤੋਂ ਉੱਚੀ ਚੋਟੀ ਨੂੰ ਫਤਹਿ ਕਰਨ ਵਾਲੇ ਬਹਾਦਰ ਐਨਸੀਸੀ ਕੈਡਿਟਾਂ ਦਾ ਸਨਮਾਨ ਕੀਤਾ ਗਿਆ। ਇਸ ਮੌਕੇ ‘ਤੇ 2 ਚੰਡੀਗੜ੍ਹ ਬਟਾਲੀਅਨ ਐਨਸੀਸੀ ਦੇ ਅੰਡਰ ਅਫਸਰ ਪਦਮ ਨਾਮਗਿਆਲ, 1 ਹਿਮਾਚਲ ਪ੍ਰਦੇਸ਼ ਬਟਾਲੀਅਨ ਐਨਸੀਸੀ ਦੀ ਕੈਡੇਟ ਕ੍ਰਿਤਿਕਾ ਸ਼ਰਮਾ ਅਤੇ 2 ਆਰ ਐਂਡ ਵੀ ਪੰਜਾਬ ਸਕੁਐਡਰਨ ਐਨਸੀਸੀ ਦੀ ਗਰਲ ਕੈਡੇਟ ਇੰਸਟ੍ਰਕਟਰ ਅਨਾਮਿਕਾ ਚੌਧਰੀ ਨੂੰ ਉਨ੍ਹਾਂ ਦੀ ਅਸਾਧਾਰਨ ਹਿੰਮਤ, ਦ੍ਰਿੜਤਾ ਅਤੇ ਸਖ਼ਤ ਮਿਹਨਤ ਲਈ ਸਨਮਾਨਿਤ ਕੀਤਾ ਗਿਆ।

ਦੱਸਿਆ ਗਿਆ ਹੈ ਕਿ 18 ਮਈ 2025 ਨੂੰ ਮਾਊਂਟ ਐਵਰੈਸਟ ਫਤਹਿ ਕਰਨ ਵਾਲੇ ਇਨ੍ਹਾਂ ਕੈਡਿਟਾਂ ਵੱਲੋਂ ਨਾ ਸਿਰਫ਼ ਐਨਸੀਸੀ ਸਗੋਂ ਪੂਰੇ ਦੇਸ਼ ਨੂੰ ਮਾਣ ਦਿਵਾਇਆ ਹੈ। ਸਮਾਰੋਹ ਦੀ ਪ੍ਰਧਾਨਗੀ ਮੇਜਰ ਜਨਰਲ ਜੇ.ਐਸ. ਚੀਮਾ, ਐਡੀਸ਼ਨਲ ਡਾਇਰੈਕਟਰ ਜਨਰਲ, ਐਨਸੀਸੀ ਡਾਇਰੈਕਟੋਰੇਟ (ਪੰਜਾਬ, ਹਰਿਆਣਾ, ਹਿਮਾਚਲ ਪ੍ਰਦੇਸ਼ ਅਤੇ ਚੰਡੀਗੜ੍ਹ) ਵੱਲੋਂ ਕੀਤੀ। ਬ੍ਰਿਗੇਡੀਅਰ ਵਿਕਰਮ ਸਿੰਘ ਚੌਹਾਨ, ਵਾਈਐਸਐਮ, ਗਰੁੱਪ ਕਮਾਂਡਰ, ਐਨਸੀਸੀ ਗਰੁੱਪ ਚੰਡੀਗੜ੍ਹ ਵੀ ਉਨ੍ਹਾਂ ਦੇ ਨਾਲ ਮੌਜੂਦ ਸਨ। ਇਨ੍ਹਾਂ ਬਹਾਦਰ ਕੈਡਿਟਾਂ ਨੂੰ ਯਾਦਗਾਰੀ ਚਿੰਨ੍ਹ, ਸਰਟੀਫਿਕੇਟ ਅਤੇ ਨਕਦ ਇਨਾਮਾਂ ਨਾਲ ਸਨਮਾਨਿਤ ਕੀਤਾ ਗਿਆ।

ਇਨ੍ਹਾਂ ਪਰਬਤਾਰੋਹੀਆਂ ਦਾ ਸਫ਼ਰ ਸਿਰਫ਼ ਮਾਊਂਟ ਐਵਰੈਸਟ ਤੱਕ ਹੀ ਸੀਮਤ ਨਹੀਂ ਸੀ। ਇਹ ਮੁਹਿੰਮ ਐਵਰੈਸਟ ਤੋਂ ਪਹਿਲਾਂ ਮਾਊਂਟ ਅਬੀ ਗਾਮਿਨ ਦੀ ਮੁਹਿੰਮ ਨਾਲ ਸ਼ੁਰੂ ਹੋਈ, ਜਿਸ ਤੋਂ ਬਾਅਦ ਨਹਿਰੂ ਇੰਸਟੀਚਿਊਟ ਆਫ਼ ਮਾਊਂਟੇਨੀਅਰਿੰਗ (ਐਨਆਈਐਮ) ਵਿਖੇ ਮੁੱਢਲੀ ਪਰਬਤਾਰੋਹੀ ਸਿਖਲਾਈ, ਸਿਆਚਿਨ ਗਲੇਸ਼ੀਅਰ ਵਿਖੇ ਸਖ਼ਤ ਸਰਦੀਆਂ ਦੀ ਸਿਖਲਾਈ, ਅਤੇ ਫਿਰ ਨੇਪਾਲ ਵਿੱਚ ਮਾਊਂਟ ਲਾਬੂਚੇ ‘ਤੇ ਚੜ੍ਹਾਈ ਕੀਤੀ ਗਈ। ਹਰ ਪੜਾਅ ਨੇ ਉਨ੍ਹਾਂ ਦੀ ਸਰੀਰਕ ਯੋਗਤਾ, ਮਾਨਸਿਕ ਤਾਕਤ ਅਤੇ ਤਕਨੀਕੀ ਮੁਹਾਰਤ ਨੂੰ ਨਿਖਾਰਿਆ।

ਉਨ੍ਹਾਂ ਦੇ ਸ਼ਾਨਦਾਰ ਪ੍ਰਦਰਸ਼ਨ ਦੇ ਆਧਾਰ ‘ਤੇ, ਉਨ੍ਹਾਂ ਨੂੰ 10-ਮੈਂਬਰੀ ਐਨਸੀਸੀ ਸੀਨੀਅਰ ਡਿਵੀਜ਼ਨ/ਵਿੰਗ ਐਵਰੈਸਟ ਐਕਸਪੀਡੀਸ਼ਨ ਟੀਮ ਵਿੱਚ ਚੁਣਿਆ ਗਿਆ, ਜਿਸਨੇ 3 ਅਪ੍ਰੈਲ ਤੋਂ 18 ਮਈ 2025 ਦੇ ਵਿਚਕਾਰ ਸਫਲਤਾਪੂਰਵਕ ਐਵਰੈਸਟ ਚੜ੍ਹਾਈ ਕੀਤੀ। ਇਹ ਚੋਣ ਇੱਕ ਆਲ-ਇੰਡੀਆ ਪ੍ਰਤੀਯੋਗੀ ਪ੍ਰਕਿਰਿਆ ਅਤੇ ਤੀਬਰ ਸਿਖਲਾਈ ਤੋਂ ਬਾਅਦ ਕੀਤੀ ਗਈ ਸੀ।

ਉਨ੍ਹਾਂ ਦੀ ਇਤਿਹਾਸਕ ਪ੍ਰਾਪਤੀ ਦੀ ਰੱਖਿਆ ਬਲਾਂ ਦੇ ਸੀਨੀਅਰ ਅਧਿਕਾਰੀਆਂ ਦੁਆਰਾ ਵੀ ਸ਼ਲਾਘਾ ਕੀਤੀ ਗਈ, ਜਿਸ ਵਿੱਚ ਨਵੀਂ ਦਿੱਲੀ ਵਿੱਚ ਹਵਾਈ ਸੈਨਾ ਦੇ ਮੁਖੀ, ਏਅਰ ਚੀਫ ਮਾਰਸ਼ਲ ਏ.ਪੀ. ਸਿੰਘ ਦੁਆਰਾ ਆਯੋਜਿਤ ਇੱਕ ਵਿਸ਼ੇਸ਼ ਸਨਮਾਨ ਸਮਾਰੋਹ ਵੀ ਸ਼ਾਮਲ ਹੈ।

ਇਨ੍ਹਾਂ ਬਹਾਦਰ ਕੈਡਿਟਾਂ ਦੀ ਸਫਲਤਾ ਨਾ ਸਿਰਫ਼ ਉਨ੍ਹਾਂ ਦੀ ਨਿੱਜੀ ਹਿੰਮਤ ਦਾ ਪ੍ਰਮਾਣ ਹੈ ਬਲਕਿ ਦੇਸ਼ ਭਰ ਦੇ ਨੌਜਵਾਨਾਂ ਅਤੇ ਐਨਸੀਸੀ ਕੈਡਿਟਾਂ ਲਈ ਪ੍ਰੇਰਨਾ ਸਰੋਤ ਵੀ ਹੈ। ਇਹ ਪ੍ਰਾਪਤੀ ਇਹ ਸੰਦੇਸ਼ ਦਿੰਦੀ ਹੈ ਕਿ ਅਨੁਸ਼ਾਸਨ, ਸਮਰਪਣ ਅਤੇ ਅਟੁੱਟ ਜਨੂੰਨ ਨਾਲ, ਕੋਈ ਵੀ ਸਿਖਰ ਅਜਿੱਤ ਨਹੀਂ ਹੈ।